Siyaasadda Villa Somalia mararka qaar ma aha mid lagu hago rabitaan keli ah ama go’aan hal dhinac ka yimaada, balse waa nidaam isku dheellitiran oo ku dhisan isfaham, is-ilaalin iyo ogaal buuxa oo ku saabsan cidda leh awoodda, cidda lumin karta, iyo waqtiga wax walba beddeli kara. Xaaladda ay ku wada jiraan saddexda mas’uul ee saaxiibka la ah madaxweynaha waa tusaale cad oo muujinaya sida heshiis siyaasadeed u noqdo mid ka xoog badan kalsooni shakhsiyeed.
Saddexdan saaxiib waxay si buuxda u ogyihiin in madaxweynuhu aanu u arkin inay yihiin wejiyada mustaqbalka ee xukunka soo socda. Ma aha arrin qarsoon in Villa Somalia ay durba ka dhex muuqdaan shaqsiyaad kale oo si dhow ula shaqeeya madaxweynaha, kuwaas oo leh damac iyo diyaar-garow ay xilalkan kula wareegaan marka fursaddu timaado. Ogaanshahaas ayaa ka dhigay in saddexdan mas’uul ay fahmaan in joogitaankooda maanta uusan ku dhisnayn kalgacal siyaasadeed, balse uu ku tiirsan yahay heshiis ku meel gaar ah oo labada dhinacba ay dan ka leeyihiin.
Dhanka kale, ka bixitaanka heshiiskan ma aha mid sahlan. Seddexdan saaxiib waxay ogyihiin in tallaabo kasta oo ay ku jebiyaan isfahamka hadda jira ay si toos ah u horseedi karto dagaal siyaasadeed oo ay Villa Somalia si buuxda u hoggaamin doonto. Taariikhda dhow ee siyaasadda Soomaaliya waxay marar badan muujisay in madaxtooyadu leedahay awood ay ku cirib-tirto cid kasta oo ka hor timaadda, gaar ahaan marka uu weli jiro waqti xilka lagu joogo. Sidaas darteed, joogitaanka heshiiska hadda jira wuxuu u yahay gaashaan ay kaga badbaadaan weerar siyaasadeed oo toos ah.
Laakiin sawirka ma dhamma dhankaas oo keliya. Villa Somalia lafteedu si fiican ayay u ogtahay in saddexdan mas’uul ay fahamsan yihiin xadka awoodda madaxtooyada iyo halka ay ka bilaabato tabarteedu. Marka muddo-xileedka madaxweynaha uu sii dhowaado dhammaadkiisa, awoodda siyaasadeed ee Villa Somalia si dabiici ah ayay u wiiqantaa. Taageero ayaa yaraata, cabsi ayaa dabcata, xisaab siyaasadeedna wuu furmaa. Xaqiiqadan ayaa ka dhigaysa in Villa Somalia aysan si fudud u jebin karin heshiiskan, maadaama ay ogtahay in cawaaqibka ka dhalan kara uu noqon karo mid ka baxsan xakamaynteeda.
Sidaas awgeed, waxa hadda socda waa isfaham ku dhisan xaqiiqo la wada ogyahay, balse aan lagu dhawaaqin. Waa heshiis aan lagu wada qanacsanayn, balse ay qasab ku tahay in la ilaaliyo. Saddexda saaxiib waxay sugayaan waqtiga ay Villa Somalia miciyaha siyaasadeed ka daadan doonaan, halka Villa Somalia-na ay isku dayayso inay heshiiska sii hayso ilaa inta ay awood u leedahay inay go’aanka ugu dambeeya iyadu yeelato.
Ugu dambayn, xaaladdani waxay muujinaysaa in siyaasadda Soomaaliya aysan ku socon hal dhinac oo awood leh, balse ay tahay ciyaar isku dheelli tiran oo ay dhinacyadu ku wada jiraan, mid walbana uu sugayo daqiiqadda uu miisaanku u leexan doono dhankiisa. Heshiiska hadda jira ma aha mid waara, balse waa mid waqtigiisa sugaya — waqti marka uu yimaado si buuxda u beddeli doona khariidadda siyaasadeed ee Villa Somalia.
