Caasimadda Muqdisho waa wadnaha Jamhuuriyadda Federaalka Soomaaliya, xarunta dowladnimada, diblomaasiyadda iyo go’aamada qaran. Sidaas darteed, amniga caasimadda ma aha arrin qof, maamul ama dano gaar ah lagu maamulo, balse waa masuuliyad si toos ah u saaran Dowladda Federaalka.
Muran siyaasadeed iyo mid amni ayaa ka dhashay tallaabada ay Dowladda Federaalka Soomaaliya ku diidday in magaalada Muqdisho lagu soo geliyo ciidan tiro badan iyo hub culus, taas oo ay wateen hoggaamiyeyaal dowlad-goboleedyo. Haddaba su’aasha taagan waa: ma saxantahay go’aanka dowladda?
Xogta Hubka iyo Ciidanka la Diiday In Lagu Soo Galo Muqdisho
Sida xogta la helay muujinayso, ciidanka la rabay in caasimadda lagu soo geliyo waxay wateen:
- 172 askari oo si buuxda u hubeysan,
- 9 Baasuuke,
- 30 BKM (qoryaha daran-dooriga u dhaca),
- 100 qori AK-47,
- 33 bastooladood,
Intaa waxaa dheer:
- 20 xabo-kartoon oo rasaas Baasuuke ah, midkiiba ay ku jireen 10 kartoon,
- 10 xabo-kartoon rasaasta BKM, kuwaas oo ay ku jireen kumanaan xabbadood oo halis ah.
Tani ma aha hub is-difaac oo caadi ah, balse waa hub ciidan oo dagaal, kuna habboon jiid dagaal, balse aan ku habboonayn caasimad dowladeed.
Maxay Khatar Ku Tahay Caasimadda?
Haddii la oggolaado in hubkan iyo ciidankan lagu soo galo Muqdisho, waxay keeni lahayd:
- Sumcad-dil caalami ah
– Waxay dunida u diraysaa farriin ah in Muqdisho aysan amni ahayn,
– In dowladda dhexe aysan gacanta ku hayn amniga caasimadda. - Khatar amni oo toos ah
– Hal shil ama isfaham-darro ayaa keeni karta isku dhac hubeysan,
– Hubka sida Baasuukaha iyo BKM-ta waxa ay halis gelinayaan shacabka rayidka ah. - Jebin nidaamka amniga Qaranka
– Amniga Muqdisho waxaa sharci ahaan mas’uul ka ah hay’adaha Qaranka,
– Ma jiro dastuur ama sharci oggolaanaya in ciidan maamul-goboleed hub culus wata ay si madax-bannaan u galaan caasimadda.
Ma Saxantahay Go’aanka Dowladda Federaalka?
Si cad: HAA, waa go’aan sax ah, sharci ah, kana turjumaya masuuliyad qaran.
Sababaha ay tallaabadu u saxantahay waxaa ka mid ah:
- Dastuur ahaan: Caasimadda waxay hoos timaadaa Dowladda Federaalka,
- Sharci ahaan: Ma jiro maamul-goboleed xaq u leh inuu hub culus keeno Muqdisho,
- Amni ahaan: Dowladda waa in ay ka hortagtaa wax kasta oo carqaladeyn kara xasilloonida caasimadda,
- Sumcad ahaan: Muqdisho waa in loo muujiyo dunida inay tahay magaalo marti-gelin karta madax caalami ah si nabad ah.
Maxay Tahay Farriinta Dowladda Federaalka?
Diidmada hubkan waxay diraysaa farriin cad oo ah:
- In hal ciidan qaran jiro,
- In hal amar amni ka shaqeeyo caasimadda,
- In Muqdisho aysan noqon karin goob ay ku tartamaan awoodo hubeysan.
Haddii maanta loo oggolaado 172 askari iyo hubkan culus, berri waxaa iman doona kuwo kale oo wata tiro ka badan, taas oo burburin karta rajada dowladnimo.
Gunaanad
Caasimaddu ma aha goob lagu muujiyo awood ciidan ama lagu cabsi geliyo hay’adaha qaranka. Waa astaan qaran, sharci iyo dowladnimo.
Go’aanka Dowladda Federaalka ee lagu diiday in Muqdisho lagu soo galo 172 askari, Baasuuke, BKM, rasaas fara badan iyo hub culus waa mid:
- Sax ah,
- Mas’uuliyad leh,
- Kuna saleysan ilaalinta amniga, sharciga iyo sumcadda Qaranka Soomaaliyeed.
Muqdisho waxay u baahan tahay kalsooni, sharci iyo hay’ado qaran, ee uma baahna qoryo culus oo dhex mushaaxaya.
