GACANKA CADMEED — 26 Agoosto 2026: Burcad-badeed Soomaaliyeed ayaa dib uga soo muuqday biyaha Gacanka Cadmeed, kaddib markii laba markab oo ganacsi lagu qabsaday muddo afar maalmood gudahood ah.Mid ka mid ah dhacdooyinka ugu dambeeyay ayaa ah afduubka M.T. Sibu 1, oo ah markab shidaal oo sita calanka Eritrea. Markabka ayaa 20-kii Agoosto lagu qabsaday meel qiyaastii 136 mayl-badeed bariga magaalada Al-Mukalla ee Yemen, waxaana burcad-badeeddu u jiheeyeen dhanka xeebaha Puntland.Markabka waxaa saarnaa 20 shaqaale, oo ay ku jiraan 16 Hindi ah iyo shaqaale kale oo ka soo jeeda Suuriya, Suudaan iyo Ciraaq.Dhacdadan waxay timid maalmo kaddib markii markab kale oo lagu magacaabo M/V LUTUF lagu afduubtay meel u dhow xeebaha Puntland. Markabka ayaa siday qalab ay ku jireen hub, isgaarsiin iyo qalab dayax-gacmeed oo la sheegay inuu ku socday xarun tababar militari oo Turkigu ku leeyahay Muqdisho.Sida laga soo xigtay Associated Press, Sibu 1 wuxuu noqday markabkii lixaad ee ganacsi ee gobolka lagu afduubo tan iyo Abriil 2026, taas oo sare u qaadday walaaca laga qabo in burcad-badeednimadii Soomaaliya ay dib u soo xoogeysaneyso.Soo noqoshada weerarradan waxay halis ku tahay ganacsiga caalamiga ah, maraakiibta ku safarta Gacanka Cadmeed, iyo amniga xeebaha Soomaaliya, gaar ahaan iyadoo gobolka uu horey uga jiray khataro kale oo amni.Waxaa sidoo kale jira warar sheegaya in Puntland ay ka hadashay weerarro cirka ah oo ka dhacay agagaarka Garacad, balse cidda fulisay weerarradaas weli si madax-bannaan looma xaqiijin.
